喺尖沙咀想食泰国菜🇹🇭，第一时间就会谂起位于The ONE嘅「Cambo」。餐厅午市时段超旺场，要等位先入得，不过店员做嘢好快手，所以好快都有位。期间客人源源不绝，有效率嘅上菜速度令佢哋能够翻多两手👍。
.
九款午餐有齐饭面粉等选择🥢，一份午餐索价由$62至$85不等，包基本冻热饮，喺尖沙咀大商场嚟讲真系唔算贵㗎喇！
.
泰式青咖哩牛腩锅($69)，🐮牛腩煲好有诚意，因为上菜时系连锅上，下底有个火㷫住🔥，咁就成程可以食住热辣辣嘅咖哩！如果咖哩汁唔热，味道再好都扣哂分。🥘青咖哩辣味明显，但都接受到嘅，而且口味正宗，入面放有大量茄子同豆角。牛腩同牛筋量唔多，但胜在大大件搭救。牛腩锅会配送一碗白饭同餐汤🍚。
.
泰式鸭肉汤粉($62)，🍜汤粉个样似足船河，但又应该唔系。一嚟餐牌无写，二嚟汤底个味唔似。汤底几特别，完全无药材或好浓嘅香料味，反而甜味比较突出。面底指定咗系河粉，正正常常都啱夹。𩠌料有连皮鸭肉同鸭血(估计系，因为我唔食)，🦆鸭肉几大片亦无骨，几入味。
.
泰式去骨海南鸡($78/四份一只)，本身想嗌鸡南鸡饭🐔，但由于实在太多嘢想食，所以就变咗单点佢。海南鸡有得拣份量，由于我哋当小食嗌最细份就好了。海南鸡味道唔错，肉质超嫩滑，去骨后都仲算几厚肉。垫底有少量椰菜同青瓜，食埋唔做大嘥鬼👻。
.
香茅烤猪颈肉($76)，泰式烧烤有相当多选择，如果有拼盘拣就好了。🐷猪颈肉份量正常，大约有八至十片，本身无太多肥膏位，唔会太油腻。但我略嫌猪颈肉火喉差少少，边边位唔够脆口。
.
饮品方面，我哋都加$8转咗特饮，分别系青柠梳打🍋同椰汁三色冰🥥，价钱合理。
.
总括嚟讲，如果喺尖沙咀想食泰菜，Cambo绝对系一个几好嘅选择😜，午餐抵食，晚市就可以食到更多菜式，有汤又有海鲜。不过座位有限，想食就最好订定枱喇！
拥有或管理这家酒店？ 免费获取您的详情页以便回复点评、更新资料或者进行其他操作。