今日约咗个朋友去油麻地交收，顺便一齐食晚饭。由于大家好耐无见，所以好想揾一间既坐得舒服又可以倾下计的餐厅。
好彩友人早有准备，带咗我嚟呢间取名「Plato」嘅楼上 Café。餐厅地点非常就脚，由港铁油麻地站 C 出口步行过嚟，亦只是两分钟路程。
餐厅嘅布置好优雅，环境舒适，气氛轻松自在，而这天我俩被安排坐在窗口位，可以眺望繁华嘅弥敦道街景，感觉特别写意。
呢度嘅食物种类都唔少，而且价钱都几大众化，餐牌有散点，亦有套餐供应。我哋叫咗两个 Dinner Set，套餐包是日餐汤、蒜蓉法包及 $34 饮品一杯，而 $34 以上就只需补回差价。
是日餐汤为杂菜清鸡汤，杂菜汤用料十足，除了蔬菜外还有不少肉粒，入口带鸡汤嘅鲜味。蒜蓉包烘得很香脆，蒜味同牛油味都好足，配餐汤吃，美味又可口。
先吃卡邦尼烟肉意大利粉 ($128)，意粉嘅火候掌握得恰到好处，烟韧而不过腍，有嚼劲。酱汁软滑 creamy，入口有好浓郁嘅芝士味，唔错。烟肉下得很慷慨，夹杂在意粉内，送上来时已切成条状，味道啱啱好，不过咸又不太淡，食落有肉香。
另一客苏格兰比目鱼扒 ($198) 质素亦甚高，鱼扒睇头十足，劲大件，煎至四边金黄，鱼皮食落好脆口，鱼肉雪白亮泽，片片分明，入口啖啖肉，细嫩得嚟又无骨，配上香气四溢的松露野菌汁吃，超美味。至于伴吃嘅配菜份量亦唔少，有香草牛油焗薯仔、西兰花同沙律菜等，够晒饱肚。
跟餐饮品点咗柠檬生姜茶同冻柠茶 (+$4)，生姜茶虽然只系用茶包冲泡，不过茶味同姜味都几突出，绝对系暖胃之选。
最后我哋仲加咗件朱古力芝士蛋糕 (+$28) 做甜品，件蛋糕嘅朱古力味真系好浓，甜得嚟又有啲甘甘地；面头嘅朱古力浆好幼滑， 令件蛋糕吃起来带点湿润感，食完真系超满足。
拥有或管理这家酒店？ 免费获取您的详情页以便回复点评、更新资料或者进行其他操作。