去开油尖旺区，行行下行到一点半，谂左一阵都唔知食乜好，就周围望下边间多人排队就食边间啦。见呢间粥舖装修企企理理，外面好多人排队。好少见粥舖会有人排队，咁呢间连星期一都咁多人排队，应该几好食啦，咁就入去试下啦。
好少见粥舖有海鲜粥，就叫一个食下。另外仲叫左一个lunch set同埋两个小食。
海鲜粥（走葱）$73（另加贵妃鸡 +$15）
因为又想食埋鸡粥，但又怕食唔晒两碗粥，就决定加$15加鸡啦。海鲜粥有蟹、虾两大只、带子同埋鱼，配料都几足够，海鲜粥系直接放入海鲜生滚嘅粥，所以粥会有啲海鲜嘅鲜甜味。因为加左鸡，所以仲有啲鸡油嘅鸡味，好食。鸡都有四五件，都几抵。粥入边嘅饭粒唔算太多，食落去咸咸地，几容易入口同几开胃，就算唔系好钟意食粥嘅人都可以试一试，捞埋鸡油一齐食嘅粥仲好食。
XO酱叉烧炒蛋饭 午餐 $54
叉烧蛋饭上边有一大堆XO酱， XO酱嘅油渗晒落去饭到，食饭嘅时候都感受到XO酱嘅香味。蛋都几滑，叉烧都几多，估唔到同XO酱都咁夹，唔知系边个谂出嚟㗎呢。白饭一粒粒煮得干身，配埋XO酱同叉烧滑蛋，好食。
例汤（跟餐$0）
入左门口之后见到有块牌写住每日有咩汤饮，每日唔同。今日系冬瓜薏仁猪骨汤，好饮。有大大旧猪骨喺汤入面，又食到少少冬瓜。
酥炸鱿鱼须 $55
酥炸鱿鱼须有好多条，份量好足够，炸出嚟嘅鱿鱼须炸粉唔算好多，炸粉嘅味道唔错，再点埋酱汁，鱿鱼须变得更好味。
海蜇手撕鸡 $52
海蜇同手撕鸡份量都好多，手撕鸡如果再滑啲就仲正。如果有辣嘅选择，我觉得海蜇手撕鸡会变得更好味，但系而家嘅海蜇手撕鸡甜甜酸酸咁，我觉得已经好足够。
食左咁多野，依家好饱好满足。
拥有或管理这家酒店？ 免费获取您的详情页以便回复点评、更新资料或者进行其他操作。