好少去到大埔咁远，今日去大埔谂住吸收下清新啲嘅空气。虽然隔住口罩，但都觉得大埔嘅空气好似特别清新咁。行左一阵，去到下午一点半，觉得肚饿，就周围揾下野食。
行下行下行到黎东昌街，突然见到呢间Homeland，坐满晒人，我估啲食物应该唔错，所以就拎张飞等位食啦。叫左个二人套餐加一个小食。
圣诞自由拣抗疫二人套餐 $248（包两碗餐汤、两份沙律、两份主食同埋两杯饮品）
是日餐汤
餐汤系甘笋汤，汤入边有好多好多嘅甘笋肉，即使系餐汤，亦非常有满足感。个汤亦非常开胃，饮落有好浓郁嘅甘笋味，饮得出系落足料嘅餐汤。
烟三文鱼杂菜沙律
沙律上有两片烟三文鱼，沙律用咗黑醋汁嚟做酱汁，食落酸酸甜甜，酱汁能轻易带出菜本身嘅味道。
巴拿马火腿杂菜沙律
本身系嗌咗慢煮鸡胸杂菜沙律嘅，但系餐厅边话冇晒鸡胸肉就免费帮我地转左做Parma Ham。我个人就更加钟意食Parma Ham嘅，所以我好开心。Parma Ham有一大片，咸香十足。而沙律方面就同烟三文鱼杂菜沙律一样用咗黑醋汁做酱料。
菠菜带子炖饭
菠菜带子炖饭非常香，酱汁望落系菠菜嘅浅绿色，食落有好香好浓嘅牛油味。饭方面，饭粒唔算太硬，配埋煎香嘅带子一齐食，成个饭非常高质。带子有四粒细嘅加一粒大嘅，都几够食。
香煎西班牙伊比利亚猪肩肉（+$30）
猪肩肉伴有酸菜，配埋酸菜之后，猪肉嘅味道即刻出晒嚟。另外仲有薯条同瓜送，薯条炸得非常香同脆，薯条亦唔系好多油，成个餐黎讲亦算非常高质。
蒜香辣椒炒蚬 $68
炒蚬份量都几多，蚬洗得几干净，唔会有沙。蒜香辣椒炒出嚟嘅蚬，唔会有海鲜嘅腥味，蒜头同辣椒仲可以带出蚬嘅鲜味，好食。另外仲有个兜比我地装住啲蚬壳添，好贴心。
冻柠水
只杯几靓。
食下食下就三点几，终于多返几张空台。
拥有或管理这家酒店？ 免费获取您的详情页以便回复点评、更新资料或者进行其他操作。