难得放假，虽然要去炮台山整d野，不过咁就一于去铜锣湾食餐好既。就去食番餐烧肉去丰富下难得既休假。
呢间放题绝对以品质取胜，所有食物即叫即整
虽然系放题但系质素同出去日式居酒屋散叫质素一样咁好
上到去见到坐位都好阔落，唔会逼住食。
装潢系高级日式居酒屋，望落好高级
睇睇佢menu，除左烧肉，餐厅menu仲有寿司、又有刺身、茶泡饭果d，够哂丰富。
一黎就烧肉感觉好油腻，就整d开胃小菜，跟住每样都叫d黎食下先。
开胃小菜有泡菜冻豆腐同仿翅伴辣海蜇。两样冷盘都好开胃。泡菜够辣，豆腐又滑，配埋一齐又有泡菜既爽脆感，又有豆腐既柔和同豆香。辣海蜇系切碎既，所以既爽口得黎又唔会烟韧得滞，调味就咸咸甜甜咁，都带辣。
跟住就有我地好钟意食既盐炒枝豆。其实枝豆喺香港街市都有得买，但系盐炒就好有日式居酒屋既感觉，简单但系就系会一条接一条咁食。枝豆炒得够干身，香得黎带甜，面头既盐花简单调味，食得好开心。
刺身拼盘就有三文鱼、赤虾、北寄贝同八爪鱼。赤虾够新鲜，有虾刺身果种爽得黎带黏既口感，鲜甜好味。三文鱼够肥，我地仲自己轻轻炙烧左一下，鱼味仲更加浓。仲八爪鱼就比较烟韧，但同样炙烧左一下之后，口感同香味都唔错
至于寿司就有鳗鱼、蟹籽军舰、带子配明太子酱。军舰岩岩包好，蟹籽同紫菜都好脆口。鳗鱼寿司都好香，带子亦都够鲜甜。
跟住系主角，系a4和牛既烧肉拼盘，有四个部位既肉。
分别系横隔肌、前胸肉、腹胁同上小排肉。一睇就见到，无论边个部位，肉既脂肪度当然够高，雪花亦都均匀。上小排肉除左雪花，仲有两边既油脂。烧完之后部分溶左，油脂感特别劲，特别香。腹胁就比较有咬口，但都只系比较有，因为a4既和牛除左真系筋位，烧完之后点都系好软熟。前胸肉同横隔肌就系脂肪最均匀既部位，烧完既香口，牛味又劲，，肉汁丰富，好食。拼盘连装住既盘都有特色，系恶鬼既样，既特别又有番餐厅既主题。
烧既野食除左和牛，仲有好多唔同既样食可以烧。有青酱生蠔同带子，同埋蒜蓉牛油版。生蠔放喺锡纸兜上面烧，调味料既量岩岩好，青酱够清新，牛油蒜蓉就够香浓。带子就连壳烧，同样系两种调味料。一路食肉，一路睇住佢慢慢烧熟，就算开始饱都仲系会食指大动。除左带子同蠔，海虾都好生鲜。成只咁烧，壳会有少少烧㶶，但都带出果种烧烤香味。另外仲青酱同牛油蒜蓉既杂菇，一兜都有唔少，而且有三种菇。
食到七七八八，想整番个茶泡饭做comfort food。佢地既三文鱼茶泡饭，大大碗，配料又丰富。香葱紫菜三文鱼松，食辣既可以捞埋wasabi。最后再整多几粒蕃薯仔做甜品，大满足！
拥有或管理这家酒店？ 免费获取您的详情页以便回复点评、更新资料或者进行其他操作。