今日放半昼，下午过左去长沙湾揾老公食晏。有人话要带我去试下佢经常帮衬的其中一个饭堂「雪山冰厅」。
原来餐厅嘅历史好悠久，始创于 1956 年， 总店位于深水埗，而长沙湾呢间就系品牌嘅第一家分店。
餐厅嘅面积唔算好大，不过台櫈摆放得好整齐企理，感觉干净卫生。店内有一幅色彩缤纷嘅金鱼喷画，拼上磁砖墙身、浅蓝灰阶花砖，装潢怀旧得嚟又带点摩登玩味。
先睇下餐牌，食物选择都几多元化，有小食、常餐、特餐、全日早餐、特色汤粉面、雪山素食之选、快餐、蛋包饭、南洋咖哩、香喷喷葱油系列、雪山精选推介、特色下午茶及下午茶炒粉面等。
我哋点左个槟城风樱花虾炒蛋特餐、两客特色下午茶，另外再加左碟黑蒜田园炒时蔬。
个槟城叻沙掺掺特餐 ($55) 真系好丰富，除左包一碗叻沙之外，仲有日本樱花虾炒蛋拼香酥丹麦多士同热饮一杯。碟炒蛋卖相真系一流，呈金黄色，水润带光泽，食落既有蛋味又有蛋香，加上入面夹杂左唔少葱花同樱花虾，令香气倍添。
至于碗槟城叻沙掺掺食味亦不俗，汤底带甜，有很香的椰奶味，十分不错。油面滑溜弹牙、而米粉亦爽口顺滑。配料有大虾、鱼片及豆卜，虾只爽甜味鲜，豆卜索满了鲜浓叻沙汤汁，味道绝不简单。
跟餐饮品点左樽仔奶茶 (+$9)，据说餐厅嘅奶茶系用左三种茶叶炮制，饮落真系好滑，而且奶味同茶味平衡得很不错，奶味唔太重，能突出到茶香，绝对值得一试。
下午茶餐点左避风塘生炸髀配海苔炸薯条及红豆冰 ($46) 同 滑蛋鳗鱼潜艇。鸡髀即点即炸，送上来时仍热气腾腾，外皮咬下脆卜卜，肉质嫩滑不韧，加上面头微辣惹味的炸蒜，呈现经典的避风塘滋味。
薯条新鲜热辣，份量多又够脆。红豆冰甜度适中，红豆大粒得嚟仲好腍身，正。
至于个滑蛋鳗鱼潜艇配杏仁霜 ($36) 亦系心水推介，潜艇堡轻柔软熟，入口有阵阵芝麻香，夹埋滑溜嘅炒蛋同肥美嘅鳗鱼一齐食，超美味。食完饮返杯顺喉微甜的杏仁霜，好满足。
黑蒜田园炒时蔬 ($45) 时蔬可以拣西兰花、白菜、生菜同芥兰，西兰花炒得好有水准，咬落有爽脆感，配上甜味的黑蒜，健康又养生。
临尾再点左杯冻鸳鸯 ($19) 咖啡味同茶味都调校得啱啱好，既有咖啡的香味又有奶茶的丝滑，唔错。
拥有或管理这家酒店？ 免费获取您的详情页以便回复点评、更新资料或者进行其他操作。