好友快将生日，想同佢食餐饭庆祝，朋友出名系个「边炉精」，吃火锅就最适合不过，既暖胃又暖心。
拣咗铜锣湾坚拿道西呢间日式火锅店「牛之锅」，餐厅最近推出咗个午市两小时火锅任食放题，成人每位只是 $118，就可以任食多款肉类、火锅配料、蔬菜、甜品及饮品，如果 +$56 仲有刺身海鲜任食，CP 值超高。一场嚟到，当然唔可以错过。
汤底可以拣一人一锅，我点咗九州猪骨汤，而友人就选了蕃茄薯仔牛粒汤。两款汤底味道都唔错，猪骨汤汤色金黄，入口带浓郁猪骨鲜味；而薯仔牛粒汤亦茄香突出，锅内不少薯仔和牛肉粒，绝对真材实料。
任食嘅肉类有 5 款，当中包括有：美国肥牛、美国极上牛肉、纽西兰羊肩肉、特选豚肉及五香鲜鸡件。美国肥牛质感嫩滑软熟，咬落不会满口韧筋同肉渣；而极上牛肉嘅肉质就相对较瘦，牛味亦较浓郁。
羊肩肉同豚肉，食味亦不俗，羊肩肉嘅羊羶味虽然都几重，但肉质好柔嫩，肉味浓郁并带有油香；而薄切的豚肉，油脂质素亦上佳，入口甘香不腻。
配料方面，蔬菜、菇类同面食就全部放咗喺自助吧台，客人可以自行外出拿取。行咗一圈，有 6 款蔬菜、 蕃茄、南瓜、粟米、金菇......等等，选择都几丰富。
另外丸类、饺类、刺身、海鲜同甜品，就以剔纸仔形式点选， 我哋每样都点咗一啲试下。麻吉烧外皮滑嫩，咬落烟韧 Q 弹，口感超正。粟米饺味道清甜，入口 Juicy 有肉汁；而风琴豆腐亦很好吃，吸满了汤底的精华，够晒入味。
刺身方面，选择虽然唔算好多，只有 8 款，不过整体嘅质素都唔错，三文鱼切得唔会太薄，够肥美又鲜甜。鲍片卖相唔错，食落有咬口；而甜虾嘅质素亦甚佳，入口鲜甜黏爽。
海鲜配料方面，点咗海虾、广岛蠔、鲍片、牛柏叶同台湾鸭血。海虾十分新鲜，肉质结实弹牙。广岛蠔够晒大只，就算唔小心渌耐咗都仲啖啖肉！牛柏叶很爽口，滚一会便可夹上来吃。鸭血非常腍滑，既大块又厚身。
甜品方面，款式有榴梿班戟、朱古力慕丝、伯爵茶奶冻、芒果布甸、冰糖雪耳炖木瓜、香草绿豆沙、软雪糕等。奶冻有好浓嘅伯爵茶味，口感很滑。木瓜嘅味道好清甜，加上爽口的雪耳，简直是绝配。绿茶雪糕茶味回甘，但又唔会太呛，质感幼滑，如果想口感更丰富，仲可以加啲雪糕配料上面。
另外饮品柜入面就放咗好多罐装同纸盒装嘅饮料，全部都系任饮。以呢个价钱可以食到咁有质素嘅任食火锅，真系超值。
拥有或管理这家酒店？ 免费获取您的详情页以便回复点评、更新资料或者进行其他操作。