今日约咗去铜锣湾做 Body Check，搅完已经接近 5pm，反正都出咗街，今晚就一于偷懒唔煮饭，嚟呢间主打马来西亚同泰国菜嘅餐厅吃晚饭。

店舖门面好 Sharp 醒，青绿色嘅中文字招牌再配以一只红辣椒，色泽抢眼，惹人注目。至于室内装潢亦很有特色，充满东南亚风情。

先睇下店员递上的餐牌，原来仲有下午茶套餐供应。至于主餐牌，选项就包括有：厨师推介、马泰街头小食、特色烧烤、沙律、汤品、菜类、地道咖哩、喇沙、汤粉、饭、娘惹糕点、甜品及饮品等。

拣咗一客无骨海南鸡饭下午茶餐、马拉盏炒通菜、咖央多士，另外再加咗一件班兰蛋糕做甜品。

泰式无骨海南鸡饭 ($66) 率先送上，鸡件分量十足，大大碟，肉质非常嫩滑，食落皮爽肉弹，加上一早已经去咗骨，入口啖啖肉，蘸点旁边稠而不咸的黑酱油吃，甚是滋味！油饭水准亦唔错，吸满了鸡汤精华，入口烟韧软糯，粒粒分明。食完再饮埋碗汤，非常满足，汤内有薯仔同鸡丝。

跟餐饮品点咗滋润的黑糖姜母茶 (+$8)，成品不大，味道颇姜，很适合冬天饮用！

马拉盏炒通菜 ($62) 一向很喜爱吃通菜，质感滑滑的，非常可口，而今次呢碟就用咗马拉盏嚟炒，入口咸香微辣，够晒惹味。

马来咖央多士 ($32) 多士可以拣蛋黄、斑兰或椰子，上桌已一分为二，卖相同一般港式三文治分别不大，不过咬下非常香脆，咖央酱涂得甚重手，食落味道自然，甜度也不高，风味正宗，让人一口接一口。

压轴出场的古早娘惹斑兰蛋糕 ($32) 亦做得很有诚意，件蛋糕应该加入咗新鲜斑兰汁制作，糕身呈漂亮嘅青绿色，味道清香天然，而且最抵赞就系蛋糕面头铺咗层甜度适度中的厚奶，令蛋糕吃起来更加软绵湿润，绝对是诚意之作。