呢间餐厅以抗争为主题，墙壁印上「Be Water」、「HongKonger 」等字眼，不时播住鼓舞嘅广东歌， 作为香港人嘅你一定会好有共鸣
海胆亲子爆丼($189)
用上加拿大同马粪海胆，味道甘甜冇腥味，入口融化圆润饱满有光泽嘅三文鱼子脆卜卜，咸鲜十足玉子层次分明带甜蛋香。赤醋饭湿润度掌握得啱啱好。刺身布满饭面，非常足料
煲底二人火锅套餐($799)
干杯蠔
选用日本濑户内海蠔，味道鲜甜冇腥味，质感细腻饱满以西柚清酒调味，食落微酸开胃再配咸鲜嘅三文鱼籽，口感更丰富
烧牛舌
牛舌大块厚身，不过烧得过火，肉质偏干唔够爽弹，而且孜然粉太重盖哂牛味
野菌黑松露汤锅
以大量新鲜菇菌熬制，有冬菇、本菇、秀珍菇等等，汤底清澈唔油腻，带阵阵黑松露香
新鲜手切本地肥牛
肥牛厚薄适中，色泽红润，油花分布均匀，肉质柔软带咬口，牛味明显比冰鲜个d浓好多
猪润
猪润洗得干净，口感爽脆微粉，味道甘香，唔会有血腥味同梳打粉味
牛骨髓
牛骨髓粗身嫩滑，带少少骚味
鲜打墨鱼丸
墨鱼丸爽口弹牙，面头有少量蟹籽点缀
花样油条
将爽弹嘅墨鱼胶酿入香脆嘅油炸鬼中。记住唔好渌太耐，咁先有双重口感
自家制鲜虾腐
外层先经油炸，口感好似鱼腐，食落软熟甜甜地
油麦菜
新鲜翠绿嘅油麦菜食落软滑清甜冇苦涩味
白桃乌龙
白桃嘅果香同乌龙嘅茶香平衡得宜
巨蜂梳打
巨蜂唔会似药水味，配埋梳打够哂清凉

餐厅：煲底海鲜火锅料理 (尖沙咀)
地址：尖沙咀金马伦道38-40号金龙中心3楼

每日经文：不但如此，就是在患难中也是欢欢喜喜的；因为知道患难生忍耐，忍耐生老练，老练生盼望；盼望不至于羞耻，因为所赐给我们的圣灵将上帝的爱浇灌在我们心里。
——‭‭罗马书‬ ‭5:3-5‬ ‭

人无事先做到世界冠军，约定你煲底见面，不见不散

尖沙咀呢间开咗未够半年嘅煲底海鲜火锅料理，系一间不折不扣嘅香港人火锅店，由外到内再到返外都系充满香港人嘅精神，钟意打边炉嘅你真系唔可以错过呢间高质火锅店‼️

餐厅可谓黄到极致，除咗用上黄同黑色作为主色，亦用上黄櫈、黄纸巾，仲有「Be Water」同「Hong Konger」等字眼系细壁，作为香港人嘅你一定会好有共鸣。而且店员嘅服务态度都好好，好倾得嚟又会介绍吓啲食物比食客听，煲底仲不时播住鼓舞香港人嘅歌曲

拣咗野菌黑松露汤锅($129)，未开炉就已经闻到阵阵黑松露香，仲有好多野菌同菇类系汤底入面

盐烧安格斯牛筋 $89
未开始打边炉紧系食下啲小食先，呢个牛筋一客有三串。先将安格斯牛小排(牛嘅肋骨部位)连筋部切片，用昆布同酒煮炆完再拎去烧，加上岩盐，因为炆过嘅关系，食落有咀嚼感但唔会好韧，而岩盐亦都冇平时嘅粗盐咁咸，唔会有食完要狂饮水嘅感觉

五色刺身拼盘 $369
有金目鲷、酱油渍旗鱼腩、海蠔，同两款时令嘅日本鱼。个人最爱用日本濑户内海蠔整成嘅干杯蠔，濑户内海嘅蠔比较鲜甜，唔会有生蠔成日闻到强烈甚至刺鼻嘅海腥味，食起上嚟更细腻，加上用咗grapefruit sake(微酸嘅酒汁)同蟹籽去配搭调味，别有一番风味，必试‼️

顶级新鲜手切本地肥牛(小) $269
打边炉又点少得肥牛，先睇下呢碟肥牛嘅刀工 ，面头有啲肥牛碎作装饰，底下围住嘅肥牛片厚薄适中，大小均匀，砌得完整吸引，油花比例算系平均，而且颜色红润，唔见有瘀红。老板教到，放落滚起嘅汤底5秒钟就食得，如果唔系就会太老，OMG，果真牛肉香味浓，虽然未至于入口即溶，但都好鲜嫩好好食

双拼自家制蟹黄包同自家制黑松露带子汤包 $109
煲底另一个卖点就系有好多自家制嘅丸同饺，蟹黄包用料十足！先将蟹黄同蟹肉炒香，再酿入包包入面，一咬开就见到丰富嘅馅料，蟹香无比；黑松露带子汤包亦满有惊喜，除咗有香浓嘅黑松露香，中间仲有一粒新鲜带子，简直就好似玩紧寻宝咁

爆汁四宝丸 $109
四款丸都系爆汁丸，食嘅时候一定一定要小心，唔好直接放入口咬开，如果唔系你会后悔的。四款丸分别有流沙墨鱼丸、酒心鸡肉丸、芝士鲜虾丸同爆汁梅菜猪肉丸，系市面上真系好少见，每一款样都好特别，仲真系款款都「爆」得好劲，欣赏煲底嘅用心

另外仲叫咗个即炸响铃拼炸鱼皮($79)同蔬菜拼盘($69)，呢度嘅响铃唔同出面果啲渌一阵就会稔哂索哂水，反而渌耐啲再食会有好香浓嘅响铃香味，食落口依然有一定韧性，亦唔会索过多嘅汁

打边炉紧系饮返杯紫贝天葵($39/jar)降下火啦，唔系间间火锅店有紫贝天葵呢款健康、消滞下火，而且酸甜开胃嘅饮品，未试过嘅人一定要试下呢；而最后食返杯朱古力生乳雪糕，真系好满足呀

约定你，我地煲底见好吗❔