好耐无去鲗鱼涌公园，见今日天气唔错，提议过去逛逛，顺便舒展下筋骨。做完运动，有人话要带我去北角汇试新嘢，咁有惊喜？原来睇中咗超市入面间「野郎蒸」。

餐厅主打蒸笼料理和石烧，所谓蒸笼料理，顾名思义就是以「蒸」这个烹调方式作为卖点，以高温蒸熟笼内嘅肉类和蔬菜，够晒原汁原味！

既然食店主打蒸笼料理，一于来个美国牛肉片蒸笼定食 ($98)，定食包前菜三点、白饭及味噌汤。牛肉同蔬菜以一个特大嘅方形木蒸笼盛上，店员教路，先用大火蒸 5 分钟，然后转细火，再按自己嘅喜好，调校牛肉嘅生熟度。

哗！一打开盖，浓浓的肉香混合木香即时涌出。牛肉肉质好嫩滑，入口又薄又软腍，而且由于以蒸的方法处理，令到肉片保留足够嘅水份，加上底部铺上大量嘅瓜菜同鸡髀菇，感觉十分清新健康。食嘅时候可以将牛肉卷住蔬菜蘸点酱汁同吃，口感会更加 Juicy 和惹味！

之后试埋佢哋嘅石烧，点了 200g 西班牙产黑豚 ($118)，只需 +$30 就可以转套餐，套餐包薯蓉/饭/汤及沙律，全部都可以无限添加，另外仲有汽水一罐，非常抵食。

沙律的椰菜丝切得够幼细，食落新鲜爽脆；而面豉汤入口亦暖笠笠，可见诚意。

豚肉以热石盛上，块块都好厚身，入口肉味颇浓郁，肉质软腍不韧，完全不嚡，食到一丝丝肉的纤维质感，而且肉汁仲好丰富，配埋软熟嘅白饭食，够晒饱肚。

另外再加点咗个薯蓉，店员话要稍等一会，原来薯蓉要即制，送上桌时热辣辣，入口香浓幼滑，食完饮埋罐汽水，超满足！