约咗朋友去食 lunch buffet，友人话想食素。记得之前喺 facebook 见有人推介铜锣湾呢间新开嘅「乐园素食」，话食物款式够多元化，而且地点方便就脚，提议试下。

店舖位于谢斐道 535 号 Tower 535 地库，店内装潢走简约路线，一室亮白，墙身上嘅手绘壁画清雅脱俗，给人一种宁静舒服嘅感觉。

餐厅喺妨疫方面都做得好足，除咗探热同提供搓手液之外，亦会提醒客人出去攞食物嘅时候要带口罩，另外每张台亦会有即弃手套供应。

先出去自助区行一转，食物款式果然好丰富，虽然无逐一数过，但目测都有数十款，包括沙律、冷盘、寿司、炸物、汤饮、热盘、甜品等。

沙律区嘅阵容虽然唔算好鼎盛，不过最基本嘅车厘茄、紫椰菜、粟米、三色藜麦、鹰嘴豆、红腰豆、沙律菜等都有齐，另外仲有 6 款酱汁同苹果供应，自己 DIY 拼咗份沙律做头盘，既鲜爽又开胃。

冷盘同前菜有冷豆腐、冷乌冬、陈醋云耳、中华沙律、胡麻手拍青瓜、日本枝豆、一口蕃薯、醃青瓜、酸姜皮蛋。陈醋云耳好爽脆，醋香十足，超醒胃！

寿司区有多款素寿司同卷物，当中包括有三文鱼、吞拿鱼、烧粟米、蟹棒、鱿鱼、芝麻加州卷、紫菜卷，整体卖相都几吸引，尤其是烧粟米寿司，食落香甜可口。另外用蒟蒻来做的素鱼片，吃起来竟然跟真的刺身没太大分别，配埋 wasabi 食，口感一流！

炸物区同包点区有：豆沙芝麻球、芋蓉地瓜丸、南瓜饼、一口萝卜、地瓜条、粟米饼、杂锦天妇罗、手抓饼、香草焗法包、公仔包、素生煎包等等，选择非常丰富。

芝麻球入口充满芝麻香，入面的豆沙甜而不腻；而地瓜丸亦金黄酥脆，带芋蓉甜香。另外个猪仔包造型亦超可爱，以软滑豆沙为内馅，十分适合小朋友享用，卖相 100 分。

是日汤品有两款，包括有：下火润肺嘅粉葛赤小豆牛蒡汤 同 清热解毒嘅咸菜凉瓜胡椒汤，凉瓜翠绿爽口又无苦涩味，健脾暖胃。

至于热盆区方面，食物就包括有：黑松露炒饭、蒸肠粉、黑椒肉丝炒面、瑞士汁炒河、茄子炆肉碎、榄菜四季豆茶树菇、蒸粟米蕃薯、姜醋蛋、卤水豆腐、南乳豆卜莲藕、椰汁芋头南瓜、葡汁四宝时蔬、酸斋、肉丝炒笋丝、姜汁芥兰、油盐水菜心、上海烤麸等。要特别推介呢款酸甜醒胃嘅姜醋蛋，入口醋香四溢，而鸡蛋亦够晒入味。

另外饮品区就有豆浆、冻水、罗汉果甘草水、洛神花柠檬水、茶包等供应。豆浆嘅豆味好浓，真材实料。罗汉果甘草水甘甜解渴，食完饭饮番杯，开胃消滞。

最后是甜品时间，这天嘅甜品有桂圆姜母桃胶、绿豆沙、和菓子、朱古力布朗尼同百香果啫喱。绿豆沙甜度啱啱好，入口带臭草嘅幽香。和菓子外皮烟韧，再加上豆沙馅，味道很不错。