之前帮衬过观塘嘅「Tapa Room」，对店舖嘅食物同服务，印象甚佳。最近从食评网得知，餐厅喺尖沙咀开咗新分店，趁今日假期，专登过嚟捧下场。

餐厅装潢很有格调，门口走廊以水滴形灯泡作装饰。入面地方颇大，空间感十足，用餐区宽敞阔落，店内设有吧台座位，配上室内的霓虹灯，添上一丝浪漫气氛。

店员好热情，我哋一坐低就过嚟介绍店里嘅食物。我哋点咗几款 Tapas，另外再加咗客二人份量嘅西班牙海鲜锅饭。

薄切慢煮八爪鱼配日本海葡萄 ($98) 率先送上，八爪鱼以慢煮方式烹调，鲜味完全被锁住，肉质软腍又不失韧性，入口鲜嫩弹牙。面头的蕃茄红椒蓉非常醒胃，酸甜冰凉，配埋富含维他命和钙质嘅海葡萄吃，既 Fresh 又健康！

接着送上的棒棒鹅肝配日本清酒 ($98) 卖相非常吸引，鹅肝搓成圆形嘅小球状，表面撒上开心果碎，用中间的竹签拮住细尝；鹅肝很幼滑，入口即溶。再喝一口清酒，酒香醇和自然，带出鹅肝绵密的口感。

跟着是一客薄切炙烧吞拿鱼腩 ($88)，吞拿鱼腩薄切，微微炙过，逼出油份，入口甘腴 Melty。垫底的沙律菜，口感亦唔错，新鲜爽脆。

之后系一客西班牙黑毛猪肉丸伴烤甜椒酱 ($78)，肉丸做得很有水准，肉质松化软熟，猪味香浓，入口汁丰味美，蘸底下嘅甜椒酱吃，清甜醒胃。

压尾出场的西班牙薯仔蛋饼配日式明太子 ($98) 亦非常之有惊喜，外层香脆金黄，入面塞满了薯仔粒及明太子蛋浆，食落外香内热，咸香中又带阵阵薯香，滋味满溢。

食完 Tapas 就轮到吃主菜西班牙海鲜锅饭 ($188)，海鲜饭配料非常丰富，除了弹牙味鲜嘅虾只外，还有青口、蚬、鱿鱼等。垫底的饭粒，色泽橘红，入口分明烟韧，湿润得嚟又唔会太腍身，好味。

饮品点咗 Red Sangria ($60) 同 White Sangria ($60) 各一，前者入口带淡淡肉桂香气，酒体圆润不涩，而后者则以白酒取代红酒，再加入青苹果和荔枝汁，入口果香浓郁，好啱女仕饮。

餐厅：Tapa Room (尖沙咀)
地址：尖沙咀弥敦道176号The Nate 2楼B号舖

之前去过Tapa Room观塘嘅分店，佢哋嘅西班牙菜真系做得非常出色。最近见到佢哋推出咗西班牙x日本嘅fusion菜式，所以就急不及待同朋友去咗尖沙咀嘅新店试试佢地嘅新菜式

同我想像中一样，佢哋尖沙咀嘅分店一样系打卡指数爆灯，等紧嘢食嘅同时影吓相就啱晒

薄切慢煮八爪鱼配日本海葡萄 $98
先将八爪鱼慢煮后切片，加入日式明太子酱同海葡萄，海葡萄经处理过劈走咗海水味，所以食落唔会好腥，而明太子嘅咸香衬托八爪鱼同海葡萄嘅鲜香就啱啱好

棒棒鹅肝配日本清酒 $98
平时就咁食鹅肝会非常腻，餐厅试话用唔同材料做配搭，结果最后用上开心果碎同日本清酒去中和鹅肝腻嘅感觉。先将鹅肝蘸满开心果碎，放入口，再即刻饮埋杯清酒先开始咬，估唔到成个味就会咁match，鹅肝同清酒嘅相辅相成，同时令清酒呛喉嘅感觉都消失咗，必试！

西班牙黑毛猪火腿及柚子蜜茄子卷配日本柚子醋汁 $68
薄薄一层嘅黑毛猪火腿包住茄子，里面再夹杂住充满柚子醋汁嘅蔬菜，连埋面头嘅柠檬一齐食，酸酸甜甜嘅味道几特别

西班牙薯仔蛋饼配日式明太子 $88
切开热辣辣嘅蛋饼，入面有丰富嘅薯仔粒同埋蛋浆，面头嘅忌廉同明太子慢慢渗入去内层，放入口暖笠笠口感丰富，虽然材料看似简单，但系味道相当好食，要注意嘅系记得捞匀入面啲明太子，如果唔系会有少少咸

甜品拼盘 $108
呢个拼盘有西班牙菓茶水信玄饼、西班牙炸油条同肉桂多士，初尝水信玄饼，用寒天粉制造，属于大菜嘅一种，口感似啫喱，仲有各款水果系入面；炸油条就比较多糖，另外加上朱古力酱，味道较为甜少少，作为饭后甜品就啱晒

难得嚟到又点可以唔饮返杯，我拣咗个white sangria($60)，而朋友就拣咗red sangria($60)。白酒加咗青苹果、荔枝同埋热情果；而红酒就加咗苹果、桃、橙同肉桂，饮落充满果香，好易入口，难怪咁多人都钟意叫佢地啦

我嚟紧嘅目标喺去埋Tapa Room嘅铜锣湾店打卡，唔知有无人想一齐去呢