今日要去铜锣湾做嘢，收工去希云街买鸡蛋仔食，顺便买些外卖回家做晚餐。记得之前睇过食评，话礼信大厦入面新开咗间韩菜料理店「韩二妹」，一于过去八下。

餐厅嘅位置虽然有点隐蔽，但其实一点也不难找，可以由希云街、礼顿道或加路连山道进出，位置四通八达。

店舖地方不大，以外卖为主，不过入面亦设有数张高脚台櫈，以供客人堂食之用。

先睇下餐牌，食物选择都几多，除了炒饭、拌饭、紫菜包饭和炸鸡，另外仲有两款捞丁、牛角包、意大利包及贝果等供应。

点咗豚肉拌饭 ($48) 同 部队炒饭 ($50) 各一客。

部队炒饭用料都几丰富，有「部队锅」必备的午餐肉、香肠、芝士同爽辣的泡菜，饭面仲放咗只娇艳欲滴嘅太阳蛋。米饭加入咗韩式辣酱嚟炒，食落香口又干身，入口粒粒分明，捞埋啲芝士一齐食，舀起仲有拉丝效果，十分邪恶！

另外个豚肉拌饭卖相亦非常吸引，色彩缤纷。豚肉嘅口感唔错，肥瘦适中，而其他嘅配料就仲有冬菇、大豆芽菜、红萝卜丝同翠肉瓜丝。面头嘅太阳蛋非常搞鬼，猫猫造型，十分可爱，同餐厅嘅主题非常吻合。

下次有机会再嚟，要试下佢哋嘅西式包类。