每逢假期都好钟意上嚟中环揾食，贪佢就脚又多选择，最近又发掘到一间新开嘅西餐厅「Good Boy Restaurant」。

餐厅位于威灵顿街新威大厦 2 楼，是间楼上舖，门面望落无乜特别，不过入面嘅环境就相当唔错。地方宽敞阔落，而且店内仲有幅绘画得很精美嘅猫猫墙，真系好靓好有 feel，啱晒同朋友嚟打卡。

先睇下店员送上嘅餐牌，食物选项都几丰富，有小食、沙律、全日早餐、芝士烤饼、汉堡包、扒类、主菜、意粉及意大利饭。

点咗个 Good Boy Jumbo 全日早餐 ($169) 同 一客烟三文鱼芦笋忌廉汁意大利饭。全日早餐用料好丰富，有炒蛋、茄汁豆、牛扒、猪肉肠、烟肉、薯饼、大啡菇、多士、车厘茄同胡麻沙律，足足有成 10 款食材，绝对称得上重量级。

牛扒煎得啱啱好，入口软腍有肉香。炒蛋软绵滑溜，蛋香十足，加上面头洒上了香草，食落更加香口。猪肉肠咸淡适中，烟肉煎得甚香口，肥瘦相间，入口咸咸香香，以多士伴吃就最适合不过。沙律菜新鲜爽脆，配上香浓的胡麻酱，健康又美味。

烟三文鱼芦笋忌廉汁意大利饭 ($109) 亦非常好吃，米饭煮得绵滑饱满，入口黏而不软，硬中带腍，食落 Creamy 又不觉腻。饭粒入面有唔少三文鱼肉同芦笋，面头嘅烟三文鱼味道很不错，够晒烟燻香，又带点油润，夹埋意大利饭一齐食，口感一流！