好耐无食过烧肉放题，最近有朋友介绍左旺角呢间主打高级烧肉嘅「八木桥」俾我，专登放半昼过嚟试下。

餐厅而家做紧抗疫优惠，只要 like 佢哋嘅 facebook 专页、喺短片留言「买一送一」及经 whatsapp 订座，就可以享有 M5 Wet Aged 和牛套餐，二人同行，一人价钱嘅优惠，不过就只限晚上 6pm 前离座。

一坐低店员就会即刻送上多款一次性嘅食物，当中包括有韩风瓷壶酱油牛肋肉、 Mozzarella 芝士鸡腿肉、米泽三元豚肉、活口鲜鲍鱼、鸡泡鱼干、比目鱼西京烧、五色刺身盛盒同一碟可以任食嘅湿式•熟成 M5 和牛西冷。

先吃五色刺身，分量虽然唔多，每样只系两件，不过全部都好新鲜，三文鱼肥美肉厚，牡丹虾亦够哂鲜甜爽弹。

用慢火煎下啲牛肋肉，将表面烧至微微焦香，而内里仍然保持粉嫩，肉质果然唔错，软腍中有嚼劲，加上牛肋条用秘制酱油醃过，Juicy 得嚟仲好入味，正。

鸡腿肉味道亦不俗，烧完后再点埋配上的芝士一齐食，肉质鲜嫩多汁，入口「芝」味十足，而且仲做到拉丝效果，超邪恶又美味。

第一次试自己烧比目鱼，好彩都无失手， 鱼肉非常滑溜，味道带甜，一点也不腻滞。另外个味醂鸡泡鱼干都好正，有咬口得嚟又不会太乾，送酒一流！

终于轮到试下今次放题嘅主角 M5 和牛西冷，烧到大约 5-6 成熟就已经可以食得。肉质好软熟，渗出甘香油脂，几乎入口即溶。

至于其他任食项目就仲包括有前菜、沙律、即炸扬物、即做天妇罗、多款唔同口味嘅肩脊肉、牛舌、牛胸腹、海鲜、甜品及饮品等。虎虾肉质结实，爽口弹牙，一定要番点！

甜品有日式蕨饼、朱古力布朗尼、泡芙、香蕉冰卷、绿豆和果子和明月冰卷等，记得要食埋雪糕同雪条，咁先够完美！