今日要去蓝田附近做嘢，收工行左过去启田市场买。有人话无心情煮饭，叫我不如改买外卖。

其实已经唔系第一次嚟呢个以英伦风设计为主题嘅街市，之前帮衬过场内嘅烧味店斩料加，今次就一于试下入口旁边呢间韩式外卖小店「韩米 Miso」。

店舖主要卖韩国传统小食，有拌饭、紫菜卷饭、炸鸡套餐、泡菜、韩式煎饼、辣炒年糕同韩式便当等供应，选择都几丰富。

店主十分热情，见我拿不定主意，主动推介我试下店里的便当同紫菜饭卷。另外店舖最近新推出左几款情人节 2 人套餐同情人节炸鸡套餐，好适合情侣 Sweet Sweet 分享。

心大心细，样样都想试，最后点左五花腩便当 ($58)、牛肉紫菜卷 ($48)、迷你泡菜 ($8)，另外再加左一罐韩国果肉提子汁 ($10)。

畀钱嘅时候，店主递左叠传统韩服造型嘅利是封畀我，原来而家凡消费满 $80，即可获赠一套，哗，好精美呀！

听店主讲，饭卷非常好卖，所以要不停手制作，见到店主自己都亲自落手落脚，由落单、收银，以至招呼客人，可谓事事亲力亲为。

返到屋企马上开餐，个便当份量十足，五花腩肥瘦均称，柔润香浓，最重要系食落仲带点焦脆，加上面头的酱汁，非常惹味。炸紫菜卷口感唔错，内里塞满粉丝，入口外脆内软，健康又美味。

至于条牛肉紫菜卷亦包得非常精美，面头贴左甜蜜嘅心心贴纸。打开见到条饭卷已切成 9 件，馅料有蛋丝、牛肉、醃萝卜、青瓜同红萝卜丝，质地烟韧挺身，食落足料又多馅。

另外个迷你泡菜，味道亦很不错，辛辣微酸，非常开胃，食饱饮埋罐提子汁，超满足，提子汁香浓又唔会太甜，入面有粒粒提子果肉，好清甜好好味。