上星期去左老公嘅其中一个饭堂「雪山冰厅」食晏，餐厅嘅食物质素真系唔错、价钱又够亲民。今日有人话要再带我去试下佢另一个饭堂「港口味冰室」。

店舖的门面好 Sharp 醒，用上白底红字招牌，绝对系香港独有嘅本土特色。

餐厅地方不大，但感觉好整齐企理，见到啲台櫈好新净，原来冰室最近先啱啱做完内部装修，黑白地板配以白砖墙身，既沉实又型格。

点左两个皇牌快餐同一碟浸时蔬，见到餐牌上嘅菜式有部分与「雪山冰厅」相同，原来听讲两间系姊妹店。

先试下呢客神级栗饲叉烧煎蛋饭 ($60)，店员话佢哋嘅叉烧非常受欢迎， 午市时段，超快售罄，好彩嚟得早，真系手快有、手慢无。个饭嘅卖相真系几靓仔，尤其是碗边几件用上西班牙伊比利亚黑毛猪炮制的叉烧，不但肥瘦适中、边位带脆，而且中间嘅肉质仲好柔软松化，调味又唔会过浓，食到肉香。

两只太阳蛋亦很值得一赞，煎得啱啱好，蛋黄呈橙黄全流心、蛋白有㶶边，配上粒粒分明嘅米饭吃，口感一流！

另外呢客镇店清汤牛腩饭 ($68) 质素亦不俗，个汤底好清甜，既有牛味又有油香，内有葱花和樱花虾。牛腩水准亦唔错，腍滑入味，而且牛味非常浓郁，口感极佳。萝卜好吃清甜，吸满了牛腩嘅精华，啖啖甘香，腍度亦适中。

两份餐都奉送热饮或例汤，点冻饮则需另 +$3、樽仔系列/特饮就 +$9。我哋点左樽仔奶茶同红豆冰，奶茶有茶香，没有涩味，甜度亦恰当。红豆冰足料又够大杯，红豆粉腍，入口有花奶香。

另外呢碟野菌浓汤浸时蔬 ($35) 味道亦很讨人欢喜，蔬菜新鲜翠绿，有西兰花、白菜仔、菜心等，入口非常鲜甜，清新又不油腻，加上当造野菌，啖啖滋味！

本来想点客下午茶餐：奶酱西多做甜品，不过见到隔离台点嘅公司三文治 ($45) 卖相非常吸引，所以即时转軚，另外仲加配左个粟米杂果沙律。烘底面包外层松脆，沙律菜及番茄用料新鲜，加埋芝士、餐肉、火腿和鸡蛋，口感好丰富。

个沙律虽然系用左罐头杂果制作，但味道很不错，酱汁浓厚微酸，而且分量十足。呢个沙律如果散叫要 $22，而家跟餐只需 +$10，真系超值，食完饮埋杯红豆冰，超满足。