今日陪老公去鸭寮街买电芯，之后去西九龙中心食晏。由于太耐无过嚟西九，所以专登上网 Search 下有乜嘢好食。

原来之前喺北角帮衬过嘅街坊小店「闺•家」，喺 3 楼开左间新分店，咁当然要去支持下。

餐厅主打猪扒饭、蔬菜手工面及无味精自家制老火汤，店内的墙身设有「见字饮汤」的霓虹灯招牌。

我哋点左个新推出嘅大柠乐手羽饭、一客招牌手工面，另外再加左两款小食。

所谓大柠乐手羽饭 ($50)，其实即系柠檬可乐鸡翼饭，鸡翼炆得非常入味，外形饱满，够晒大只，肉质嫩滑又 Juicy，入口酸酸甜甜，用来拌饭吃一流。

跟饭配有一客细嘅老火汤，是日老火汤为苹果红萝卜沙参煲咸排骨，碗汤十分足料，清甜润肺，饮得出无落味精，有营养又健康。

点主食 +$5 可以配热饮品一杯，配冻饮亦只须 +$7，非常抵饮。

至于另一客手剁香煎莲藕饼配紫薯面 ($45) 亦非常美味，莲藕饼以人手即叫即剁，食落松软得嚟又带点爽身，口感真系一流，香口又惹味。紫薯面也很好吃，面条以纯面粉及鸡蛋人手搓制，再加入紫薯泥制成，入口柔韧滑顺，带紫薯甜香。

小食点了招牌猪扒 ($18) 及卤水凤爪 ($30)，猪扒即叫即煎，上台时仍热辣辣，肉质很鲜嫩，带果汁的甜味。

鸡脚味道亦很不错，外观晶莹油润，充满光泽，大大只又唔甩皮，食落够晒软腍，加上卤水汁入味带甜，好啱我哋两个口味。虽然间餐厅新开，但系临走已经见佢全场爆满，可见相当旺场。