上次食港口味冰室时见到隔离都新开左呢间食海南鸡饭，所以今日放假就黎叹返个下午茶！

·招牌海南鸡饭配轻怡新加坡白胡椒肉骨茶 (HKD 58)
据说呢间餐厅嘅鸡饭系用电饭煲煮成，可以令到鸡油索哂落饭粒到食落仲有好香嘅斑兰味！鸡肉去骨，口感嫩滑不韧，也不油腻。最特别都系肉骨茶，新加坡口味嘅肉骨茶同平时我地饮开嘅唔同，佢唔会好重药材味，以胡椒味为主打，清淡易入口

·龙虾叻沙掺掺 (HKD 88)
只龙虾大只到好多膏，而且肉质好弹牙！叻沙系属于椰香味浓个种，汤底加入左豆卜、鱼片、鱼蛋等配料，非常惹味掺掺亦即是米粉加油面作面底，系非常正宗嘅做法！

·鲜油咖央多士 (HKD 28)
第一次食咖央多士，原来系咁好味！咖央酱香浓幼滑，多士烘得岩岩好，好脆！厚厚嘅半溶牛油令咖央酱味道更立体

·青柠菠萝梳打水 (跟餐+ HKD 9)
呢杯野饮超岩夏天饮！甜甜地又有气，简直透心凉呀❤️个卖相仲好夏日

·椰青 (跟餐+ HKD 18)
朋友见到有椰青饮超兴奋！清新香甜超解渴，朋友连椰青肉都食得一干二净椰肉系超多好嘅功效架！大家平时饮都唔好晒左佢呀～

长沙湾最近新开嘅餐厅都好有质素，系附近返工嘅人有口福了
-

屋企附近又开新餐厅啦！我梗系唔执输，又去试新嘢啦！呢间餐厅叫「苏山鸡饭」，净系睇个名就知应该系出名食鸡，一于去试一试！
.
晚市套餐，都真系几平，我地叫咗个套餐「狮城芽菜走地鸡饭」配「轻怡新加坡白胡椒肉骨茶」，都只系$78，绝对系街坊价！
.
味道方面，只鸡的确系几好食！入口好滑溜，肉质够晒幼嫩！估唔到走地鸡完来可以咁好食！仲有看似系配角嘅芽菜，其实最有惊喜，超级爽甜多汁，饭真系一流！同埋大家一定要食油饭，佢碗油饭真系粒粒都充满油香！好够味，好正！
.
至于跟餐配嘅「轻怡新加坡白胡椒肉骨茶」，味道都好有惊喜！唔会好似平时饮开的只有药材味，你会饮到白胡椒味道中带点药材味，两者嘅味道估唔到又几夹，几新颖！
.
一个饭又点够满足我地两个，食星马菜一定要食咖央多，两个字形容「邪恶」！满满既咖央酱，大大块鲜牛油，仲有烘到好香脆既面包，好满足啊！
.
继续食，唔好比佢停！仲有小食孖宝，春卷+鱼饼！跟餐加$22就有啦！之后我地仲叫埋「马拉盏炒椰菜苗」，呢个马拉盏劲惹味！就算唔食得辣都食到，又唔会过咸，咁搞法真系整多碗饭都得！
.
最后整埋枝樽仔奶茶，真系满足到极点！
呢间我绝对会再Encore，因为我仲想试埋海南鸡，任务未完成
.
苏山鸡饭 
长沙湾元州街411号义华大厦地下


上个月去左老公嘅饭堂「港口味冰室」食晏，见到餐厅隔离新开左间星马菜馆，看过门外餐牌，见啲嘢食都几吸引，价钱又经济，一于揾晚去帮衬下。

餐厅环境走怀旧茶室风格，黑白地板、啡木椅桌，再配上墙身上嘅壁画作点缀，装潢古朴，带南洋风味。

先细心研究一下餐牌，食物选项非常丰富，除了招牌鸡饭、肉骨茶等之外，仲有炒粿条、叻沙、虾面、咖央多士、小食、饮品，甚至连糖水都有供应。

我哋拣左招牌海南鸡饭、肉骨茶配白饭，另外再加左一客小食同一碟炒椰菜苗。

先试下佢哋嘅招牌海南鸡饭 ($68)，鸡件鲜嫩肥美，滑溜不韧，入口啖啖肉。油饭相当美味，每粒饭都充满鸡油同班兰嘅香味，而三款酱汁亦与鸡饭很夹。连随饭奉送的冬瓜鸡汤亦绝不马虎，原汁原味，清甜开胃，用料又足！

另外呢客配上白饭嘅新加坡白胡椒肉骨茶 ($62) 味道亦很讨人欢喜。肉骨茶大大碗，没有苦涩嘅药材味，入口清淡，带阵阵迷人嘅白胡椒香气，很合我俩心意，鲜甜肉骨加上香口油条，真系令人一食难停。

小食点左脆炸凤尾虾春卷 ($32) 一客有 4 件，丝网般嘅春卷皮做得很透薄，入口超级松脆，炸到连虾尾都食得。入面嘅虾肉好新鲜，爽口弹牙，吃时可沾少许酸辣酱，能解炸物油腻感。

食完咁多肉，当然要吃点蔬菜来中和一下，选了一客马拉盏炒椰菜苗 ($45)，菜苗新鲜嫩绿，加上香口惹味嘅马拉盏，味道浓郁，口感爽脆，非常好吃。

饮品点左恐龙美禄 (+$19) 同 雪山樽仔咖啡 (+$15)，恐龙美禄面头铺左层厚厚嘅美禄粉，入口有好 Rich 嘅朱古力味，绝对唔会越饮越淡。樽仔咖啡浓香中又带点甘苦，甜度刚好。

意犹未尽，决定再点多客鲜油咖央多士 ($22) 同 摩摩喳喳 ($25)。多士外层烘得金黄酥脆，咖央酱很 Runny，富椰香和班兰香，夹上冰冻的厚切牛油，真系够晒邪恶。

摩摩喳喳味道亦无得输，厨师喺椰汁和花奶中混入了芋头、黄番薯、紫薯、凉粉、西米等，碗边仲围咗一片片香蕉，用料超丰富，食落仲有好浓嘅椰奶香味，口感一流，为晚餐完美作结。

餐厅：苏山鸡饭 (长沙湾)
地址：长沙湾元州街411号义华大厦地下

出开长沙湾，去咗呢间平民价钱嘅新马混合港式茶餐厅，相信同我一样困咗喺香港咁耐嘅你地都好挂住唔同地方嘅美食，好在香港喺一个美食天堂，唔同国家嘅菜式好易就可以揾到

新加坡白胡椒肉骨茶配白饭 $63
新加坡嘅白胡椒，加上用咗二十几款药材熬制嘅肉骨茶，食落唔会有出面种又浓又咸又重中药味嘅味道，以胡椒味为突出，唔会呛喉，滋补养生，钟意食浓味少少嘅仲可以加埋秘制酱油同辣椒️，不过我就钟意咩都唔加咁食喇，啲肉仲超超超腍添

招牌海南鸡饭 $65
海南鸡即三黄鸡，鸡肉较嫩滑，鸡香无咁出，反而油香满满，配埋用细煲仔煲嘅鸡油饭，一煲只喺整到四碗饭，目的希望令到油饭粒粒分明而且充满匀均油香，够晒用心

狮城芽菜走地鸡饭 $68
走地鸡即文昌鸡，肉质较瘦，鸡肉鲜味十足，仲用咗嚟自新加坡嘅芽菜做伴碟，唔知你又钟意食边款鸡呢？

我地三个加$22配咗个3只嘅Susan鸡翼，本身以为喺鸡中翼，点知系原只鸡全翼，挤埋海南嘅桔仔汁，食落清新同冇咁热气；另外加咗$15要埋个鲜油咖央多士，睇吓啲咖央酱同鲜牛油几厚，真系超级邪恶

呢度嘅特饮青柠菠萝梳打水(+$9)，同埋香茅薄荷特饮($9)各有特色，仲好啱用嚟打卡，佢哋嘅樽仔奶茶同咖啡喺自家制嘅，原来连埋附近几间餐厅都喺同一个老细，呢个质素都真系几抵食，去匀几间餐厅随时换吓口味都仲得