俩口子都很喜爱吃面，一星期总会有两、三餐以面条为主食。今日嚟湾仔做嘢，收工约埋老公去附近食碗面先返屋企。

喺骆克道见到这间「永豪面家」，店舖主打传统云吞面，门口仲贴左份杂志嘅介绍同相片，探头内望，环境干净企理，今晚就一于喺呢度开餐。

餐牌很简单，一张过，面食分为汤类、捞类，另外仲有小食、糖水及饮品等供应。

点左招牌云吞面 ($38)、京都炸酱捞面 ($50) 同 姜葱黑柏叶 ($60)。

碗面上台，匙羹垫底，云吞放喺中间，面在其上，以防面条浸泡过久而变软发胀，规格正宗。先试一口汤，味道很清甜，有大地鱼同虾子的鲜香，喝后顺喉，没味精反应。面条幼身，爽口弹牙，食落有面味。云吞细细粒，虾同猪肉嘅比例啱啱好，入口皮薄滑溜。

碟京都炸酱捞面味道亦唔错，炸酱酸甜度平均，入口微辣带香，仔细品尝更会有甘甜味从后而至，加上肉丝切得幼细，分量又够多，面条嘅软硬度亦刚好，真系令人回味无穷。

平日都好钟意食牛柏叶，贪佢够爽口弹牙，呢度嘅姜葱黑柏叶，味道更正。天然无加工，爽脆有咬劲，配上姜葱同辣椒豉油吃，十分好味，绝对值得 Encore ！

呢度嘅饮品，选择都几丰富，除左有咖啡、奶茶、冷热饮品等之外，仲有罐装汽水同支装豆浆等供应。

食完面想食碗糖水滋润下，大家都不约而同地点左杏仁露 ($28@)。碗杏仁露以南北杏每日新鲜磨制，入口甜度适中，杏味香浓，内有雪耳同粒粒莲子，用料十足，口感好丰富，滋味又润肺。