已经有好一阵子没来筲箕湾揾食，早两日有好友报料，话筲箕湾道形荟 1 楼新开左间「九井食堂」。

呢间日本餐厅喺食评网一向人气高企，所以一直好想揾日去帮衬，不过总店喺香港仔，位置稍嫌有点吊脚，而家开到落嚟东区，就晒我，当然唔可以错过。

餐厅装潢非常抢眼，门面采开放式，店内面积颇大，空间阔落，环境相当开扬，墙身上的壁画，色彩缤纷，令人心情愉快。

餐牌印刷得很精美，食物选项非常丰富，除了寿司、刺身、卷物等之外，仲有丼饭、天妇罗、锅物、定食及小食等供应。另外成人每位只须付 $13 便可以无限量任饮汽水、咖啡、茶或特饮。

我哋点左三文鱼三色丼定食 ($130)、牛肉寿喜烧 ($92)、海老天妇罗 ($45)、盐烧日本油甘鱼鲛 ($68) 同 海苔鱿鱼 ($28)。

三文鱼三色丼卖相非常吸引，三文鱼肉质很嫩滑，油润肥美，而且块块都好厚切，口感一流！帆立贝鲜嫩爽口，味道清甜，加埋咸鲜不腥嘅三文鱼籽，三种鲜味十足嘅食材摆埋一齐，简直系完美配搭，食完真系超级大满足！

除左丼饭，个定食仲包括有滑溜又富蛋香嘅茶碗蒸、清爽醒胃嘅和风沙律同咸淡适中嘅面豉汤。

锅物嘅汤底可以自选，有寿喜烧、韩式泡菜同我哋拣嘅猪骨浓汤可供选择。汤底用左大量猪骨熬制而成，入口浓郁味鲜。至于材料就有特选牛肩胛、豆腐、金菇、鳕鱼腐、冬菇同椰菜，分量十足。牛肩胛肉质好爽滑，入口牛味香浓，只须简单灼一灼已经很滋味。

另外个锅物仲可以选配赞岐乌冬、御饭、拉面或和风沙律。乌冬雪白滑溜，极富烟韧口感，入口柔软弹牙。

钟意食香口嘢嘅话，就一定要试下呢度嘅海老天妇罗。虾只好粗身，肉质结实弹牙，外层的炸浆厚薄适中，入口香脆热辣。

鱼鲛大大件，即点即烧，送上来时仍热辣辣。鱼皮好香脆，色泽金黄，鱼肉雪白，食落有弹性，而且弄得很入味，咸鲜有致。

另外个海苔鱿鱼，食味亦不俗，鱿鱼烟烟韧韧，海苔味突出，香口又唔油腻。呢餐食得好满意，下次有时间会再嚟试下佢哋嘅卷物同寿司。