虽然已经踏入 4 月，但系天气仍然乍暖还寒，趁住仲未正式进入夏天， 加上一连几日公众假期，一于把握时机，去吃顿火锅。

今次拣咗铜锣湾渣甸中心 25 楼一间取名「阿来客栈」嘅新开火锅店，餐厅主打重庆鸡煲，可以先吃鸡后打边炉，另外亦其他火锅汤底可供选择。

我哋拣咗个花胶瑶柱鸡做汤底，餐厅而家做紧 Promotion，为咗庆祝新张开业，客人点鸡煲或汤底可享半价优惠，半只鸡都只系 $84，非常抵食。

另外芥酱方面，收费亦非常经济，每位只需 $10。

先试下个花胶瑶柱鸡汤，汤色呈金黄，味道带甜，内有半只鸡、瑶柱、杞子同大大件花胶，用料好足。鸡肉十分嫩滑、瑶柱滋补养阴、花胶富弹性。

至于火锅配料方面，贵精不贵多，只系点咗几款，包括有：特级手切肥牛、鲜虾云吞、韮菜饺、面食同莴笋，另外再加咗个小食鬼马墨鱼脆。

鬼马墨鱼脆 ($48)，净系听个名都已经够晒盏鬼，油条中间酿入了墨鱼胶，咬下外香脆、内弹牙，吃时可沾少许甜酸酱，口感会更佳。

打边炉当然唔少得肥牛，呢碟特级手切肥牛 ($198/半份) 真心唔错，不但油花漂亮，而且牛味极浓，只需在汤中轻涮至稍稍变色即可，入口嫩滑软腍，值得推荐。

即包鲜虾云吞 ($36/半份)、即包韮菜饺 ($30/半份)，两款都包得好大只，十分足料，而且外皮好薄，云吞真系食到有原只虾系里面，爽口弹牙。韮菜饺亦唔输蚀，入面嘅韮菜十分丰满，食得出用料新鲜，好重韮菜味。

面食拣咗四川薯粉 ($16/半份)，薯粉外表晶莹剔透，食落有弹性，就算煮耐咗都唔会好容易断开。

最后食埋个莴笋 ($16/半份)，碟莴笋好新鲜，口感爽脆，幼嫩又无渣，打完边炉食返啲菜蔬，好正。