今日天气唔错，加上又系星期日，本来打算去睇场戏再 Shopping，点知有人兴致勃勃，话要带我去行山。

原来有人一早已经拟定好路线，由湾仔峡公园行去香港仔水塘，好彩都唔算太辛苦，行毕全程都只系用咗两个多小时，连我这个行山初哥都能轻松驾驭。

行完山有点攰，又肚饿，最方便就是去香港仔中心揾食！估唔到有人连午餐都已经安排好，预早喺「九井食堂」订咗位，认真细心。

餐厅午市有定食供应，我哋点咗九州牛肉拉面 ($82) 同 蒲烧原条鳗鱼 ($98) 各一客，另外再加咗刺身、寿司、天妇罗同小食。

无谂过佢哋嘅午餐咁抵食，除咗主菜外，仲可以任食沙律、面豉汤同饮品，全部都唔需要额外加钱。

碗拉面系猪骨汤底，汤头浓而不咸，入口渗出淡淡酱油香，好够味，唔错。牛肉份量颇多，肉质嫩滑，一点也不嚡口。至于其他配料就仲有粟米、鸣门卷、溏心蛋、紫菜同木耳等，非常足料。

鳗鱼定食配有白饭，如果想转铿鱼饭素、乌冬、拉面、 紫菜温泉蛋丼或鳗鱼炒饭，就要另 +$5-$20 不等。鳗鱼肉质好滑溜，食落带点焦香，加上肉身够厚，酱汁甜蜜味美，绝对是水准之作。

碟三文鱼刺身 ($45) 亦唔失礼，件件都好肥美，新鲜油润，而且色泽亮丽又够厚切，味道鲜甜。

另外碟火炙三文鱼腩寿司 ($30) 口感都唔错，鱼腩经火炙后逼出鱼油，令鱼香味更加突出，食落甘香可口。

压尾送上的海老天妇罗 ($45) 同 炸墨鱼咀 ($35) 也不输蚀，虾天妇罗外面炸至金香薄脆，内里爽滑弹牙；墨鱼咀外层脆身、内里软熟，香口非常！

食完饭梗系要食返啲甜品先够完美，点定食套餐，加 $12 就可以换购 Mövenpick 雪糕一杯，咁笋，当然唔可以错过， 一人一盒唔使争。