烧味饭普遍香港人都经常食，而香港嘅烧鹅饭餐厅如果整得好食，更加会远近驰名。以前都去过深井一啲出名嘅食烧鹅餐厅，但系记忆中味道只系中规中距。今次好庆幸竟然喺蓝田市区入面食到一碗色香味俱全嘅烧鹅饭，而佢嘅烧鹅饭亦衬得起大壹烧鹅呢个名称。

烧鹅饭大大碗绝冇欺场。价钱亦唔贵，可谓蔗渣既价钱，真正烧鹅嘅味道。烧鹅皮烧得香油脂亦多，但绝冇肥膏。烧鹅味浓郁，肉质软淋，啖啖甘香。要赞一赞嘅系佢嘅豉油汁，又唔会死咸又香，绝对衬得起咁美味嘅烧鹅。而烧鹅酱自家制，酸酸甜甜，值得一赞。

呢度当然唔系净系得烧鹅饭食咁简单啦。仲有好多出色嘅小菜，例如依煲油鸭芋头煲。腊鸭咸香味好重，配上软绵嘅芋头质感，配搭送饭食一流，份量又足。

]莲藕饼又系我好钟意食嘅一道茶餐厅小菜。除咗大大件可以食饱个肚之外，猪肉同莲藕嘅配搭，煎完之后皮脆肉嫩，口感丰富，令人忍不住一口接一口。

最后都忍唔住点多只乳鸽，乳鸽同样皮香肉嫩。烧得啱啱好，肉质唔会好老，系好好嘅佐酒食品。